މާލޭގެ މޭޔަރު ހޮވުމަށް މިއަދު ބޭއްވި ބައި -އިލެކްޝަންގައި މިހާތަނަށް ގުނުނު ވޯޓުން އެމްޑީޕީގެ ފަރާތުން ވާދަކުރެއްވި އާދަމް އާޒިމް ބޮޑު ތަފާތަކުން ކުރި ހޯއްދަވައިފި އެވެ.
މިއަދު ހެނދުނު 8 އިން ހަވީރު 5 ޖެހުމާ ހަމައަށް ބޭއްވި އިންތިހާބުގައި މިހާތަނަށް ގުނުނު ފޮށިތަކުން އާޒިމް ވަނީ 2،395 ވޯޓު ކާމިޔާބުކުރައްވައިފަ އެވެ.
މިއަދު ބޭއްވި އިންތިހާބުގެ ނަތީޖާ މިހާތަނަށް ގުނި ވޯޓުގެ ނަތީޖާ ދައްކާ ގޮތުން:
- ޕީއެންސީގެ ކެންޑިޑޭޓު އައިޝަތު އާޒިމާ ޝަކޫރު: 1،485 ވޯޓް
- ދަ ޑިމޮކްރެޓްސްގެ ކެންޑިޑޭޓު މުހައްމަދު ސައިފް ފާތިހު: 724 ވޯޓު
- ޕީއެންއެފްގެ ކެންޑިޑޭޓު ހުސައިން ވަހީދު: 570 ވޯޓު
- އަމިއްލަ ގޮތުން އިންތިހާބުގައި ވާދަކުރެއްވި ޝުއައިބު އަލީ: 28 ވޯޓު
މާލޭގެ މޭޔަރު ކަމުގެ އިތުރުން ސިޓީ ކައުންސިލުން ހުސްވެފައިވާ ތިން ދާއިރާ ކަމަށްވާ، ހެންވޭރު ދެކުނު ދާއިރާ އާއި މާފަންނު ދެކުނު ދާއިރާގެ އިތުރުން މެދު ހެންވޭރު ދާއިރާގެ ބައި އިލެކްޝަންގެ ވޯޓުލުންވެސް މިއަދު ކުރިއަށް ދިޔައެވެ.
