މާލޭގެ މަގެއްގެމަތީގައި އޮތް ބުޅަލެއްގެ ގަޔަށް ވަޅި ހަރައި މަރާލި މައްސަލައިގައި ހައްޔަރުކުރި މީހާއަށް ދައުވާކުރަން ކުރިއަށް އޮތް ހަފުތާއެއްހާ ދުވަހުގެ ތެރޭގައި ޕްރޮސިކިއުޓާ ޖެނެރަލް (ޕީޖީީ) އޮފީހަށް ފޮނުވާނެ ކަމަށް ފުލުހުން އިއްޔެ ބުނެފިއެވެ.
މިދިޔަ މަހުގެ 13 ވަނަ ދުވަހު ހިނގި އެ ހާދިސާއާ ގުޅިގެން ހައްޔަރުކޮށްފައި ވަނީ މ. ކޮޅުފުށި އުމުރުން 45 އަހަރުގެ އަހުމަދު ނަސީމެވެ.
ނަސީމުގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން އޭނާގެ ބަންދަށް މިދިޔަ މަހުގެ 18 ވަނަ ދުވަހު ދިނީ 15 ދުވަހެވެ. އެ މުއްދަތު ހަމަވުމުން، އޭނާގެ ބަންދަށް މި މަހުގެ ތިން ވަނަ ދުވަހު ވަނީ އިތުރު ދިހަ ދުވަސް ޖަހައިފައެވެ.
ނަސީމުގެ ބަންދު އަމުރުގައިވާ ގޮތުގައި އޭނާ ވަނީ އެ ބުޅަލަށް ހަމަލާދިނުމަށްފަހު އިތުރު ބުޅަލަކަށްވެސް ހަމަލާ ދިނުމަށް މަސައްކަތް ކޮށްފައެވެ. އޭނާގެ ބަންދުގެ މުއްދަތު އިތުރުކުރީ ބަންދުން ދޫކޮށްލައިފިނަމަ މުޖުތަމައަށް ނުރައްކާ އޮތް ކަމަށް ޝަރީއަތަށް ފެންނާތީ ކަމަށް ވެސް އަމުރުގައިވެއެވެ.
ނަސީމު ބުޅަލެއްގެ ގަޔަށް ވަޅި ހަރާ ވީޑިއޯއެއް ސޯޝަލް މީޑިއާގައި އާންމުވެފައިވާއިރު، ޝަރީއަތުގައި އޭނާ ބުނީ ވީޑިއޯއަކީ މިހާރު ކޮންމެ މީހަކަށްވެސް ހެދިދާނެ އެއްޗެއް ކަމަށެވެ.
