އެލައިޑް އިންޝުއަރެންސް ކުންފުނީގެ މެނޭޖިން ޑިރެކްޓަރުގެ މަގާމަށް އެ ކުންފުނީގެ ކްލެއިމްސް ސެކްޝަންގެ މެނޭޖަރުގެ މަގާމުގައި ހުންނެވި ހުސެން ލުވައިޒް އައްޔަނުކޮށްފިއެވެ.
އެލައިޑުންވަނީ އޭނާ މަގާމަށް އައްޔަންކުރިކަން ރަސްމީކޮށް އިއުލާންކޮށްފައެވެ.
ލުވައިޒްއަކީ މީގެ 21 އަހަރު ކުރިން ފެށިގެން އެ ކުންފުނީގައި މަސައްކަތް ކުރައްވަމުން ގެންދަވާ ފަރާތެކެވެ. 2002 ވަނަ އަަހަރު ކުންފުންޏާ ގުޅިވަޑައިގެންނެވި ލުވައިޒް އަކީ ޗާޓާޑް އިންޝުއަރެންސް އިންސްޓިޓިއުޓް، އޮސްޓްރޭލިއާ އަދި ނިއުޒީލަންޑް އިންސްޓިޓިއުޓް އޮފް އިންޝުއަރެންސް އެންޑް ފައިނޭންސްގެ ސީނިއާ އެސޯސިއޭޓް ގެ އިތުރުން މެލޭޝިއާ އިންޝުއަރެންސް އިންސްޓިޓިއުޓްގެ އެސޯސިއޭޓެއްވެސް މެއެވެ.
ލުވައިޒް މަގާމާ ހަވާލުވުމާ ހަމައަށް މީގެ ކުރިން އެ މަގާމުގައި ހުންނެވީ މުޙައްމަދު ޝަފާޒެވެ. އެފަހަރު ޝަފާޒް މަގާމަށް އައްޔަން ކުރީ އެ ކުންފުންޏަށް ފަސް އަހަރު ހިދުމަތް ކުރައްވަމުން ގެންދެވި އަހުމަދު އަމީލް އިސްތިއުފާ ދެއްވުމާ ގުޅިގެންނެވެ. ޝަފާޒަކީ އެ ކުންފުންޏަށް 29 އަހަރު ވަންދެން ހިދުމަތް ކުރެއްވި ބޭފުޅެކެވެ.
