ނޫސްމަޖައްލާ ރަޖިސްޓްރީކުރުމުގެ ފޯމް ބަލައިގަތުން ވަގުތީ ގޮތުން މެދުކަނޑައިލާފައިވާ ކަމަށް މިނިސްޓްރީ އޮފް ޔޫތު އެމްޕަވަރމަންޓް, އިންފޮމޭޝަން އެންޑް އާޓްސްއިން ހާމަކޮށްފިއެވެ.
މިނިސްޓްރީން ބުނީ މިހާރު ނޫސް މަޖައްލާ ރަޖިސްޓްރީ ކުރުމުގެ ކަންތައް އެ މިނިސްޓްރީގެ މެންޑޭޓްގެ ދަށަށް ބަދަލުވުމުން ނޫސް މަޖައްލާ ރަޖިސްޓްރީކުރުމަށް ހުށަހަޅަންޖެހޭ ފޯމުތައް އިސްލާހުކުރުމުގެ މަސައްކަތްކުރަމުން ގެންދާ ކަމަށެވެ. އެހެންވެ ނޫސް މަޖައްލާ ރަޖިސްޓްރީކުރުމުގެ ފޯމް ބަލައިގަތުން ވަގުތީ ގޮތުން ވަނީ މެދުކަނޑާލާފައި ކަމަށެވެ.
ފޯމުތައް އިސްލާހުކުރުމުގެ މަސައްކަތް ނިމުމުން އަލުން ފޯމް ބަލައިގަތުމަށް ހުޅުވާލާނެ ކަމަށް މިނިސްޓްރީން ވަނީ ބުނެފައެވެ.
ނޫސް މަޖައްލާ ރަޖިސްޓްރީކުރުމުގެ މަސައްކަތްކުރަމުން އައީ ކުރީގެ މިނިސްޓްރީ އޮފް ހޯމްއެފެއާޒުންނެވެ. ނަމަވެސް މި މަސައްކަތް މިހާރު ވަނީ މިނިސްޓްރީ އޮފް ޔޫތު އެމްޕަވަރމަންޓް, އިންފޮމޭޝަން އެންޑް އާޓްސްގެ މެންޑޭޓްގެ ދަށަށް ބަދަލުކޮށްފައެވެ.
