ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއާއެކު ސާބިތުވެ ތިބުމަކީ ދިވެހި ޤައުމާއި ރައްޔިތުންނަށް އޮތް އެންމެ ރަނގަޅުގޮތްކަމަށް އެމަނިކުފާނުގެ ސްޕެޝަލް އެޑްވައިޒަރު ޢަބްދުއްރަޙީމް ޢަބްދުﷲ ވިދާޅުވެއްޖެއެވެ.
ޢަބްދުއްރަޙީމް އެކްސްގައި ކުރެއްވި ޕޯސްޓެއްގައި ވިދާޅުވީ، ޕީޕީއެމް/ޕީއެންސީއަކީ "އެންމެ ފުރަތަމަ ޤައުމު" އިސްކުރާ ދެ ޕާޓީ ކަމަށާއި އެ ޕާޓީގެ ލީޑަރޝިޕުން ތިއްބެވީ ދިވެހި ރައްޔިތުންގެ ނިންމުމާއި އެއްގޮތަށް ރައީސް ޑރ. މުޢިއްޒުގެ ފަހަތްޕުޅުގައި ސާބިތުކަމާއެކު ކަމަށެވެ.
ޢަބްދުއްރަޙީމް މިހެން ވިދާޅުވެފައިމިވަނީ، ޕީޕީއެމް/ޕީއެންސީގެ ލީޑަރޝިޕުން ރައީސް ޢަބްދުﷲ ޔާމީން ޢަބްދުލްޤައްޔޫމް އަށް އެއްބާރުލުން ނުދެއްވާކަމަށް ތުޙުމަތުކުރައްވައި، ޕީޕީއެމްއިން އެމަނިކުފާނު ވަކިވެވަޑައިގެންނެވުމާއެކު ޕީޕީއެމް/ޕީއެންސީގެ ލީޑަރޝިޕާމެދު ރައީސް ޔާމީން އަށް ތާއީދުކުރައްވާ ބޭފުޅުން އެކި ވަރުގެ ތުޙުމަތުކުރައްވާ ދަނޑިވަޅެއްގައެވެ.
މިގޮތުންވެސް އެންމެ ބޮޑަށް ވާހަކަދެކެވެނީ ޢަބްދުއްރަޙީމްއާ ގުޅުވައިގެންނެވެ. އެގޮތުން، ރައީސް ޑރ. މުޢިއްޒު ހުންނެވީ ޢަބްދުއްރަޙީމްގެ އަތްދަށުވެފައިކަމަށް ކުރީގެ ނައިބު ރައީސް ޑރ. މުހައްމަދު ޖަމީލް އަހްމަދު ވަނީ ވިދާޅުވެފައެވެ.