އިންތިހާބީ ރައީސް ޑރ. މުހައްމަދު މުއިއްޒު ހުވާ ކުރައްވާ ރަސްމިއްޔާތުގައި، ނިމިގެން މިދާ ސަރުކާރުގެ ރައީސް އިބްރާހިމް މުހައްމަދު ސޯލިހު ބައިވެރިވެވަޑައިގަންނަވާނެކަން އެނގިއްޖެއެވެ.
ސަރުކާރުގެ އިސް އޮފިޝަލަކު ވިދާޅުވިގޮތުގައި، މިއަދު ހަވީރު ޖުމްހޫރީ މައިދާނުގައި ބާއްވާ ދިވެހި ޖުމްހޫރިއްޔާގެ އަށް ވަނަ ރައީސް ޑރ. މުއިއްޒު ހުވާ ކުރައްވާ ރަސްމިއްޔާތައް ރައްޔިތުންގެ މަޖިލީހުން ފޮނުވާފައިވާ ދައުވަތު ރައީސް ސޯލިހު ވަނީ ގަބޫލު ކުރައްވައިފައެވެ.
ރައީސް ޑރ. މުޢިއްޒުގެ ހުވާ ކުރުމުގެ ރަސްމިއްޔާތު އޮންނާނީ މިއަދު ހަވީރު 4:45 ގައި ޖުމްހޫރީ މައިދާނުގައެވެ. ޖަލްސާގައި ބައިވެރިވެ ވަޑައިގަންނަވާ ބޭރު ޤައުމުތަކުގެ އިއްޒަތްތެރިން މިހާރު ރާއްޖެ ވަނީ ވަޑައިގެންފައެވެ.
އަދި ހަމައެހެންމެ އާ ސަރުކާރުން އެކުލަވާލާ ވަޒީރުންގެ މަޖިލީހުގެ މެންބަރުން މަގާމުގެ ގާނޫނީ ހުވާ ކުރެއްވުމާއި، އެބޭފުޅުންނަށް މަގާމުގެ ފަތްކޮޅު ދެއްވުމުގެ ރަސްމިއްޔާތު މިރޭ 7:45 ގައި ރައީސުލްޖުމްހޫރިއްޔާގެ އޮފީހުގައި ބޭއްވުމަށް ވަނީ ހަމަޖެހިފައެވެ.
އެހެންފަހަރުތަކާ ހިލާފަށް ވެރިކަން ބަދަލުވުމުގެ މަރުހަލާވެސް މިފަހަރު ނިމިގެން ދިޔައީ އަމާންކަމާއެކުއެވެ. އިންތިހާބުގެ ނަތީޖާ ގަބޫލުކޮށް، ވެރިކަން ބަދަލުކުރުމުގެ ކަންކަމުގައި ނިމިގެން މިދާ ސަރުކާރުން އާ ސަރުކާރަށް އެއްބާރުލުމާއި އެހީތެރިކަން ވަނީ ދީފައެވެ.
