މުދައްރިސުންގެ ސުލޫކީ މިންގަނޑާ ގުޅޭ އުސޫލަށް 1 ވަނަ އިސްލާޙު ގެނައުމުގެ އުސޫލުގެ ދަށުން މޫނު ބުރުގާ އަޅައިގެން ކިޔަވާދެވޭގޮތަށް ހަމަޖައްސައިފިއެވެ.
މިއަހަރު ޖުލައިމަހު މިނިސްޓްރީ އޮފް އެޑިއުކޭޝަނުން އާންމުކުރި މުދައްރިސުންގެ ސުލޫކީ މިންގަނޑާ ގުޅޭ އުސޫލުގައިވާ ގޮތުން ކިޔަވައިދޭއިރު އަދި ދަރިވަރުންނާ މުޢާމަލާތު ކުރާއިރު ހުންނަންވާނީ ކާކުކަން އެނގޭފަދަ ގޮތަކަށެވެ. މި އުސޫލުގެ ދަށުން މޫނު ބުރުގާ އަޅައިގެން ކިޔަވައިދިނުމުގެ ފުރުޞަތު އޮތީ ބަންދުވެފައެވެ.
ނަމަވެސް ސަރުކާރުގެ ގެޒެޓްގައި މިއަދު އާންމުކުރި މުދައްރިސުންގެ ސުލޫކީ މިންގަނޑާ ގުޅޭ އުސޫލަށް 1 ވަނަ އިސްލާޙު ގެނައުމުގެ އުސޫލުގައި ބަޔާންކޮށްފައިވާ ގޮތުގައި މޫނު ނަގައިގެން ކިޔަވައިދޭން ޖެހެނީ ހަމައެކަނި 10 އަހަރުން ދަށުގެ ކުދިންނަށް ކިޔަވައިދޭއިރުގައެވެ.
ނަމަވެސް، ކިޔަވައިދިނުމުގެ މާޙައުލަކީ މޫނު ހާމަކުރެވޭފަދަ ތަނެއް ނޫންނަމަ މޫނު ބުރުގާ އަޅައިގެން ކިޔަވައިދިނުމުގެ ފުރުޞަތު އެބައޮތެވެ.
އެހެންނަމަވެސް މޫނު މުބުރުގާ އަޅައިގެން ކިޔަވައިދޭ މުދައްރިސުންވެސް އަބަދުވެސް ތިބެންވާނީ ސްޓާފް ކާޑު އަޅައިގެންކަމަށް އެ އުސޫލުގައި ބަޔާންކޮށްފައިވެއެވެ.